නගරසභා ආඥා පනතේ 180 (1) වගන්තිය අනුව සෑම නගර සභාවකම සභාපතිවරයා විසින් එක් එක් මුදල් වර්ෂය අවසාන වීමෙන් පසුව හැකිතාක් ඉක්මනින් එම මුදල් වර්ෂය ඇතුලත ප්‍රදේශීය අරමුදල නිමිත්තෙන් ලැබුණු හෝ වියදම් වු මුදල්වල ස්භාවය හා ප්‍රමාණය දැක්වෙන ප්‍රකාශයන් ද සමඟ එම වර්ෂය ඇතුලත සභාවේ පරිපාලනය පිළිබඳ සවිස්තර වාර්තාවක් පිළියෙල කල යුතුයි.
2018.02.10 දින පැවති නව පළාත් පාලන මැතිවරණ ක්‍රමය අනුව මා සභාපති ධූරයට පත්වීමෙන් පසුව 2018 අප්‍රේල් මස සිට කැස්බෑව නගර සභාවේ පාලන කටයුතු ආරම්භ කරන ලද අතර ඒ වන විටත් 2018 වර්ෂය වෙනුවෙන් සම්මත කර තිබූ අයවැය ලේඛණය සභාව තුල ඉදිරියට ගෙන යමින් 2018 වර්ෂයට සකස් කරන ලද අයවැය ඇස්තමේන්තුව අනුව නියමිත වැඩ සටහන් 05 තුල ආදායම් වියදම් පාලනයකින් යුතුව පවත්වා ගන්නට උත්සහ කළෙමි.
පවතින සීමිත සම්පත් උපයෝගි කරගනිමින්, කාර්යක්ෂමව හා සඵලදායීව මහජනතාවට සේවා සැපයීමට කාර්ය මණ්ඩලය මෙහෙයවීමෙන් මහජනතාවට සමීප වෙමින් ඔවුන්ගේ අත්‍යවශ්‍ය සේවාවන් වඩා කාර්යක්ෂමව ඉටුකිරීමට " ගමයි - සභාවයි "තේමාව කර ගනිමින් කොට්ඨාශ මට්ටමින් ජංගම සේවා වැඩසටහනක් ආරම්භ කල අතර, 2018 වර්ෂය වෙනුවෙන් කොට්ඨාශ 04ක් ආවරණය වන පරිදි ජංගම සේවාව පවත් වන ලදී.
මහ සභා අනුමැතිය මත මාර්ග සංවර්ධන කටයුතු සඳහා ඍජු ශ්‍රම ව්‍යාපෘතියක් ආරම්භ කිරීමටත්, පුස්තකාල සඳහා ආරම්භ කර තිබූ ස්වයංක්‍රියකරණ කටයුතු වෙනුවෙන් පැවති සේවක අවශ්‍යතාවය සඳහා ව්‍යාපෘතියක් අනුමත කරගැනීමටත් හැකියාව ලැබුණි.
2018 වර්ෂයේ ජාත්‍යන්තර ළමා දින වැඩසටහන, වැඩිහිටි දින වැඩසටහන හා සාහිත්‍ය උත්සවයද ඉතා උසස් මට්ටමකින් පැවැත්වීමට පක්ෂ විපක්ෂ මන්ත්‍රී කණ්ඩායම් වශයෙන් ලබාදුන් සහයෝගය ඉතා අගය කරමි.
එමෙන්ම බල ප්‍රදේශයේ පාසල්වල 2,3,4,5 ශ්‍රේණිවල දරුවන් 8321 ට අභ්‍යාස පොත්66568 ක් රුපියල් මිලියන දෙකක මුදලක් වැයකරමින් රටේ අනාගත පරපුර වෙනුවෙන් දායාද කිරීමටද හැකියාව ලැබුණි.
2018.01.01 දින සිට ක්‍රියාත්මක කරන ලද ප්‍රතිශෝධිත වරිපනම් තක්සේරුව අනුව වරිපනම් බදු ආදායම මිලියන 80කට ආසන්න මුදලක් එකතු කිරීමට පැවති අතර, එයින් 65%ක වරිපනම් ආදායමක් 2018 වර්ෂය තුල එකතුකර ගැනීමට හැකි විය. 2018 වර්ෂයේ සමස්ත ආදායම 100 %ක් ලැබී තිබේ.
එමෙන්ම සභා අරමුදල් රු. මිලියන 109 ක්ද, පළාත් සභා අරමුදලක් රු මිලියන 32 ක්ද, පළාත් සභා හා පළාත් පාලන අමාත්‍යංශ අරමුදලින් රුපියල් මිලියන 10ක්ද, විමධ්‍යගත අරමුදලින් රුපියල් මිලියන 14ක්ද යොදවමින් බල ප්‍රදේශයේ මාර්ග හා යටිතල පහසුකම් සංවර්ධන කටයුතු ඉටු කිරීමට හැකි විය.
මෙම උපයෝගිතා සේවා හා සුබසාධක සේවාවන්ද අපේක්ෂිත මට්ටමින් ඉටුකර ගැනීමට හැකි වූ බවද, සඳහන් කරමි.
2018 වර්ෂය තුල ඉටු කළ සමස්ථ කාර්යන් හා පොදු සේවාවන් පිළිබඳ තොරතුරු ද මෙම ආදායම් හා වියදම් පිළිබද තොරතුරු පරිපාලන වාර්තාවට ඇතුලත් තර තිබේ.
මෙම කාර්යයන් ඉටු කිරීමට මා හට ශක්තියක් වූ ශ්‍රී ලංකා පොදු ජන පෙරමුනේ කැස්බෑව ප්‍රධාන සංවිධායක හා හිටපු කම්කරු හා කම්කරු සබදතා ගරු අමාත්‍ය ගාමිණී ලොකුගේ මැතිතුමා ඇතුළු ගරු පාර්ලිමේන්තු මන්ත්‍රීතුමන්ලා, ගරු පළාත් සභා මන්ත්‍රීතුමන්ලා හා නගර සභාවේ ආණ්ඩු පක්ෂ ගරු නාගරික මන්ත්‍රීතුමන්ලා හා ප්‍රතිපක්ෂ ගරු නාගරික මන්ත්‍රීතුමන්ලා කණ්ඩායමක් ලෙස මා හට ලබා දුන් ශක්තිය කෘතවේදීව සිහිපත් කරමි.
2018 වසරට සාපේක්ෂව 2019 වර්ෂයේ විශාල ජනතා මෙහෙවරක් සිදු කිරීමට අපේක්ෂා කරන බැවින් ඔබ සියළු දෙනාගේම හා නගර සභා කාර්ය මණ්ඩලයේ සහයෝගය ලැබෙනු ඇතැයි විශ්වාස කරමි.
ආපසු